أبد مؤقّت
إلى الصديق المتفلسف جهاد الوسلاتي
كِ سْكُنْتْ إسمي
كانْ إسمي الماءْ
وْكُنْتْ الماءْ ،
لا احْتَجْتْ أرضْ
وْلا احْتَجْتْ سْماءْ ،
اغْتَرّيتْ ..
ڨُلْتْ نْمِدْ حتى يْطُولْ هَالبِنْيانْ
عَلّيتْ فيه الذّاكْرَة
وْفِيَّ عَلا النِّسيانْ …
وِاصْبَحْتْ
عَبْدْ لْحاجْتي لِلماءْ وْلاِسمِ الماءْ
وِلْكُلْ ما يْذكِّرْني
إنّي أنا الِّي كُنْتِكْ
وْأخْطِيتْ لمّا خُنْتِكْ
يا ذاكْرِةْ الأشْياء
****
كِ سكُنتْ إسمي
كانْ إسمي النَّارْ
وْكُنْتْ النارْ ،
أوّل شَغَفْ ينْزَعْ ثْيابُه
وْتَتْبْعُه الأسْرارْ ،
وِالكُونْ كانْ سْريرْ
وِالوقتْ شِيخْ ضْريرْ
تْمَنَّى بْسَمَاعُه يْشُوفْنا
دَلُّه الصَّدَى عْلَى لْهَاثنَا
عْلَى مُوضْعِةْ شَهْوَاتْنَا
عْلَى وِينْ يِنْبِتْ خُوفْنَا ،
وْحِينْ اِنْتْبَهْنا دَارْ
وْطاح فوڨ كُومْ اَحْجَارْ …
طْفِينَا احْنَا الإثْنينْ ،
وْهُوَّ انْكَسَرْ في الحِينْ
نِصْفِينْ :
لِيلْ / نْهارْ
****
كِ سْكُنْتْ إسمي
كانْ إسمي هْوَاءْ
وْكُنْتْ هْوَاءْ
جْرَحْتِ الْحَياةْ .. أحْيِيتْها
كِ مْشيتْها من ألِفْها للياءْ
وْأوْدَعْتْ سرّي الناي ،
والنايْ روح الڨافلة
وشُوڨ المسافة الجافلة
يْجُوسِ الثّنايا الغافلة
وْيِسْنِدْ عَلَى الْغَنَّايْ ،
وْكُلْمَا انْكَسَرْ غْناهْ
تْناسى التّعب وَعْنَاهْ
أَوْدَعْ أَنَاهْ مْعَ الصَّدَى
وْغنّى وَجَعْ أنايْ
****
كِ سْكُنتْ إسمي
كان إسمي ترابْ
وْكنت تْرابْ
تكّيتني عالوقت
صِرْتْ آنا وْظِلّي أغرابْ
إنسان في إله / إله في إنسان
بِنيانْ إسمه كْيانْ
وِكْيانْ كُلُّه خْرابْ ،
يا مْلامْحِي يا سْنينْ
يا مْشَڨّڨَة في الطِّينْ
مازلت فيَّ تْنِينْ
وْتحْتاج ألف غْرابْ
حتّى تْواري يْديكْ
ما أتِيتْ مِنْ أخْطابْ .
****
كِ سْكُنتْ إسمي
كان إسمي ..
وْكُنتْ خِيط سْرابْ
رابط التسجيل الصوتي للقصيد على موقع Soundcloud
https://l.facebook.com/l.php?u=https%3A%2F%2Fw.soundcloud.com%2Fplayer%2F%3Furl%3Dhttps%253A%252F%252Fapi.soundcloud.com%252Ftracks%252F613853478%26color%3D%2523ff5500%26auto_play%3Dtrue%26hide_related%3Dfalse%26show_comments%3Dtrue%26show_user%3Dtrue%26show_reposts%3Dfalse%26show_teaser%3Dtrue%26fbclid%3DIwAR0q0IiCbU02G53Uc0t2gndCd5Jyraw0FCmFjWPxiKbTtoDr0lrqZKocRbY&h=AT2E9Op-m7urIZGKKsGmNt4dbemqapoDile-q-9vNOmi1FPZ362T8LP1dx4mJZqTeXzbpr7e1vAzRTL3hx1N-ZXaRunaXjzpoJUc1WfkLdHlShuE1lMZwAzQcGXOT14PnaVL2g
